انسان اللہ تعالیٰ کی تمام مخلوق میں افضل ہے۔ شکل وصورت اور علم وشعور دونوں اعتبار سے اللہ تعالیٰ نے انسان کو اپنی دیگر مخلوقات پر برتری بخشی ہے۔ اسی کے متعلق ارشادِ باری تعالیٰ ہے:
’’وَ لَقَدْ کَرَّمْنَا بَنِيْٓ اٰدَمَ وَحَمَلْنٰہُمْ فِي الْبَرِّ وَالْبَحْرِ وَرَزَقْنٰہُمْ مِّنَ الطَّيِّبٰتِ وَفَضَّلْنٰہُمْ عَلٰی کَثِيْرٍ مِّمَّنْ خَلَقْنَا تَفْضِيْلًا‘‘ (الاسراء:۷۰)
’’ اور ہم نے آدم (علیہ السلام) کی اولاد کو عزت دی ، اور ہم نے ان کو خشکی اور دریا میں سوار کیا اور نفیس نفیس چیزیں ان کو عطا فرمائیں اور ہم نے ان کو اپنی بہت سی مخلوقات پر فوقیت دی۔‘‘
دوسری جگہ ارشاد ِ باری تعالیٰ ہے:
’’لَقَدْ خَلَقْنَا الْإِنْسَانَ فِيْٓ أَحْسَنِ تَقْوِيْمٍ‘‘ (والتّین:۴)
’’ کہ ہم نے انسان کو بہت خوبصورت سانچے میں ڈھالا ہے۔‘‘
اس آیت کے تحت امام بغوی رحمۃ اللہ علیہ اپنی تفسیر میں لکھتے ہیں کہ: ’’انسان قدوقامت کے لحاظ سے متناسب اور شکل وصورت کے لحاظ سے حسین ترین ہوتا ہے۔ باقی سب حیوانات آگے کو جھکے ہوتے ہیں، جبکہ انسان سیدھی قدوقامت میں ہوتا ہے ۔ اپنے کھانے کی چیز کو ہاتھ میں لیتا ہے،عقل اوراشیاء میں تمیز کرنے سے مزین ہوتا ہے۔‘‘ (معالم التنزیل فی تفسیر القرآن:۸/۴۷۲، دارطیبہ)
اب وہ علم جس کا تعلق براہِ راست جسمِ انسانی کی حفاظت وبہتری سے ہے، وہ بھی شرافت کا حامل ہے، اسی لیے طب کا شعبہ ان فضائل کا حامل ہے جو دیگر شعبوں کو میسر نہیں۔ اس شعبے کا وقار اس بات کا تقاضا کرتا ہے کہ اس سے وابستہ افراد اپنے اخلاق وعادات میں دوسروں سے ممتاز ہوں۔
نبی کریم صلی اللہ علیہ وسلم کی مبارک تعلیمات میں طبیب اور دیگر افراد جو صحت کے شعبے میں خدمات سرانجام دیتے ہیں، ان کے لیے رہنمائی ہے۔ آنے والی سطور میں آنحضرت صلی اللہ علیہ وسلم کی تعلیمات کی روشنی میں ان اقدار کے حوالے سے گفتگو کی جائے گی جن سے طبی میدان میں کام کرنے والے افراد بالخصوص معالجین (ڈاکٹرز) کو وابستہ ہونا ضروری ہے۔
اس حوالے سے ہم آنحضرت صلی اللہ علیہ وسلم کا وہ ارشاد نقل کرتے ہیں جس سے امام بخاری ؒ نے اپنی صحیح کا آغاز کیا ہے:
’’إِنَّمَا الْأعْمَالُ بِالنِّيَّاتِ، وَإِنَّمَا لِکُلِّ امْرِئٍ مَّا نَوٰی، فَمَنْ کَانَتْ ہِجْرَتُہٗ إِلٰی دُنْيَا يُصِيْبُہَا، اَوْ إِلَی امْرَاَۃٍ يَّنْکَحُہَا، فَہِجْرَتُہٗ إِلٰی مَا ہَاجَرَ إِلَيْہِ۔‘‘ (صحیح البخاري، کتاب بدء الوحي، کَيْفَ کَانَ بَدْءُ الوَحْيِ إِلٰی رَسُولِ اللہِ صَلَّی اللہُ عَلَيْہِ وَسَلَّمَ؟ رقم:۱)
’’تمام اعمال کا دارومدار نیتوں پر ہے اور ہر عمل کا نتیجہ ہر انسان کو اس کی نیت کے مطابق ہی ملے گا۔ پس جس کی ہجرت (ترکِ وطن) دولتِ دنیا حاصل کرنے کے لیے ہو یا کسی عورت سے شادی کی غرض سے ہو، پس اس کی ہجرت ان ہی چیزوں کے لیے ہو گی جن کے حاصل کرنے کی نیت سے اس نے ہجرت کی ہے۔ ‘‘
اس ارشادِ گرامی کی روشنی میں ایک طبیب کو چاہیے کہ وہ مریض کو دیکھتے ہوئےاپنی نیت دنیوی مفادات سے بڑھ کر اللہ تعالیٰ کو راضی کرنے کی کرے، اور چونکہ اللہ تعالیٰ اس بندے سے راضی ہوتے ہیں جو اس کی مخلوق کے ساتھ حسنِ سلوک کرے، لہٰذا یہ اچھے طریقے سے اللہ کے بندے کی تکلیف دور کرنے کی کوشش کرے۔ یہ اس بات سے مانع نہیں کہ آدمی مریض سے فیس نہ لے، بلکہ جو مشورہ وہ دے رہا ہے اس کے بدلے میں مناسب اُجرت لینی بھی جائز ہے۔ ایسے ہی جو لوگ طب کی تعلیم وتحقیق سے وابستہ ہیں وہ بھی انسانیت کو فائدہ پہنچانے اور اس کے ذریعے اللہ تعالیٰ کوراضی کرنے کی نیت کریں۔
طبیب کی حیثیت ایک مشیر کی ہوتی ہے۔ لوگ اپنے جسمانی مسائل طبیب کے علم پر اعتماد کرتے ہوئے اس کے سامنے رکھتے ہیں، تاکہ وہ ان کا حل بتاسکے، اس لیے طبیب کی ذمہ داری ہے کہ وہ مریض کو بہتر مشورہ دے۔ اپنے فائدے کی خاطر مریض کو ایسا مشورہ دینا گناہ ہے جو اس کے لیے نقصان دہ ہو، مثلاً جراح (سرجن) بلا ضرورت مریض کو آپریشن کرالینے کا مشورہ نہ دے۔
’’عن أمِّ سلمۃ، قالت: قال رسولُ اللہ صلی اللہ عليہ وسلم: ’’المُستشارُ مُؤتَمَن۔‘‘ (سنن الترمذي، أبواب الأدب، باب اَنّ المستشارَ مؤتَمَن، رقم:۲۸۲۲)
’’رسول اللہ صلی اللہ علیہ وسلم نے فرمایا:جس سے کسی معاملے میں مشورہ کیا جائے وہ اس میں امین ہے (اور اس کے سپرد امانت کی جاتی ہے)۔ ‘‘
رحم ایک عمدہ صفت ہے، اللہ تعالیٰ کے ناموں میں رحمان ورحیم بھی ہیں۔ دونوں سے معلوم ہوتا ہے کہ اللہ تعالیٰ اپنے بندوں پر نہایت رحم کرنے والے ہیں۔ اپنے بندوں میں بھی اللہ تعالیٰ اس بندے کو پسند کرتے ہیں جس میں رحم دلی ہو۔ طبیب کے لیے رحم دل ہونا ضروری ہے ۔ انسانوں کے دکھ درد کو محسوس کر کے ان کا علاج کرنا اس صفت کے بغیر ممکن نہیں۔ نبی کریم صلی اللہ علیہ وسلم کا مبارک ارشاد ہے:
’’عَنْ عَبْدِ اللہِ بْنِ عَمْرٍو قَالَ : قَالَ رَسُوْلُ اللہِ صَلَّی اللہُ عَلَيْہِ وَسَلَّمَ: الرَّاحِمُوْنَ يَرْحَمُہُمُ الرَّحْمٰنُ ارْحَمُوْا مَنْ فِي الْأرْضِ يَرْحَمْکُمْ مَنْ فِي السَّمَاءِ الخ۔‘‘ (سنن الترمذي، أبواب البر والصلۃ، باب في رحمۃ المسلمین، رقم:۱۹۲۴)
’’حضرت عبداللہ بن عمرو بن عاص رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا کہ: رحم کرنے والوں اور ترس کھانے والوں پر بڑی رحمت والا رحم کرے گا، زمین پر رہنے بسنے والی اللہ کی مخلوق پر تم رحم کرو تو آسمان والا تم پر رحمت کرے گا۔ ‘‘
معالج کے منصب کا تقاضا ہے کہ لوگوں کے لیے آسانیا ں فراہم کرے۔ تکلیف میں مبتلا شخص اور اس کے احباب پر سے دشواریاں دور کرے اور انہیں مزید مشکلات میں نہ ڈالے۔ بے جا دوائیاں اور لیبارٹری ٹیسٹوں کی بھرمار کرکے مریضوں کو مالی مشکلات میں مبتلانہ کرے۔ اللہ تعالیٰ اپنے ایسے بندوں کو پسند فرماتے ہیں جو لوگوں کے لیے آسانیوں کی جائز صورتیں مہیا کرتے ہیں۔ معالج کو امید کی کرن بننا چاہیے نہ کہ تاریکیوں میں دھکیلنے والا۔ حضرت ابوہریرہ رضی اللہ عنہ نبی اکرم صلی اللہ علیہ وسلم کا ارشاد نقل کرتے ہیں:
’’مَنْ نَفَّسَ عَنْ مُسْلِمٍ کُرْبَۃً مِنْ کُرَبِ الدُّنْيَا نَفَّسَ اللہُ عَنْہُ کُرْبَۃً مِنْ کُرَبِ يَوْمِ الْقِيَامَۃِ، وَمَنْ يَسَّرَ عَلَی مُعْسِرٍ فِي الدُّنْيَا يَسَّرَ اللہُ عَلَيْہِ فِي الدُّنْيَا وَالْآخِرَۃِ۔‘‘ (سنن الترمذي، کتاب البر، باب ماجآء في الستر علی المسلم، رقم:۱۹۳۰)
’’جو کسی آدمی کی دنیوی تکلیف کو دور کرتا ہے اللہ تعالیٰ اسے دنیا اور آخرت میں راحت سے نوازتے ہیں، جو تنگی میں مبتلا شخص کے لیے آسانی کرتا ہے اللہ تعالیٰ اس پر دنیا آخرت میں آسانی فرماتے ہیں۔‘‘
طب کا شعبہ ایک احساسِ تحفظ کا تقاضا کرتا ہے، جہاں مریض ڈاکٹرکو علامات سے آگاہ کرنے میں آزاد ہو۔ بسا اوقات مریض کسی ایسی بیماری میں مبتلا ہوتا ہے جس کا اظہار اس کے لیے شرمناک ہوتا ہے، مثلاً وظیفۂ زوجیت کی ادائیگی پر قدرت نہ ہونا، خواتین کے حیض سے متعلق مسائل وغیرہ۔ ا س صورت حال میں طبیب کو مریض کے اعتماد کو ٹھیس نہیں پہنچانا چاہیے اور بغیر اس کی اجازت کے معلومات آگے مشترک نہیں کرنی چاہئیں۔ مریض کے مرض اور جسمانی عیوب سے متعلق معلومات ڈاکٹر کے پاس ایک راز ہوتا ہے، جس کی حفاظت ضروری ہے۔ ایک جگہ آنحضرت صلی اللہ علیہ وسلم نے ایک مجلس میں کی جانے والی باتوں کو امانت قراردیا۔ ملاحظہ فرمائیں:
’’عن جابر بن عبداللہ قال: قال رسول اللہ صلی اللہ عليہ وسلم: ’’المجالسُ بالامانۃِ إلا ثلاثۃَ مجالس: سفکُ دم حرام، أو فرجُ حرام، او اقتطاعُ مالٍ بغيرِ حق۔‘‘ (سنن أبي داؤد، کتاب الأدب، باب في نقل الحدیث، رقم:۴۸۶۹)
رسول اللہ صلی اللہ علیہ وسلم نے فرمایا: ’’مجلسیں امانت داری کے ساتھ ہیں (یعنی ایک مجلس کی بات دوسری جگہ جا کر بیان نہیں کرنی چاہیے) سوائے تین مجلسوں کے، ایک جس میں ناحق خون بہایا جائے، دوسری جس میں بدکاری کی جائے اور تیسری جس میں ناحق کسی کا مال لوٹا جائے۔ ‘‘
دوسری جگہ مسلمان کے عیوب چھپانے پر عظیم خوشخبری سنائی گئی ہے:
’’عَنْ اَبِيْ ہُرَيْرَۃَ، عَنِ النَّبِيِّ صَلَّی اللہُ عَلَيْہِ وَسَلَّمَ قَالَ: مَنْ نَفَّسَ عَنْ مُسْلِمٍ کُرْبَۃً مِنْ کُرَبِ الدُّنْيَا نَفَّسَ اللہُ عَنْہُ کُرْبَۃً مِنْ کُرَبِ يَوْمِ القِيَامَۃِ، وَمَنْ يَسَّرَ عَلٰی مُعْسِرٍ فِي الدُّنْيَا يَسَّرَ اللہُ عَلَيْہِ فِي الدُّنْيَا وَالْآخِرَۃِ، وَمَنْ سَتَرَ عَلٰی مُسْلِمٍ فِي الدُّنْيَا سَتَرَ اللہُ عَلَيْہِ فِي الدُّنْيَا وَالْآخِرَۃِ، وَاللہُ فِيْ عَوْنِ الْعَبْدِ مَا کَانَ الْعَبْدُ فِيْ عَوْنِ اَخِيْہِ۔‘‘ (سنن الترمذي، کتاب البر، باب ماجآء في الستر علی المسلم، رقم:۱۹۳۰)
’’حضرت ابوہریرہ رضی اللہ عنہ راوی ہیں کہ نبی صلی اللہ علیہ وسلم نے ارشاد فرمایا :جو کسی آدمی کی دنیوی تکلیف کو دور کرتا ہے اللہ تعالیٰ اسے دنیا اور آخرت میں راحت سے نوازتے ہیں ،جو تنگی میں مبتلا شخص کے لیے آسانی کرتا ہے اللہ تعالیٰ اس پر دنیا آخرت میں آسانی فرماتے ہیں ۔ اور جو کسی مسلمان کےعیبوں کی پردہ پوشی کرتا ہے اللہ تعالیٰ اس کے عیبوں کی پردہ پوشی فرماتے ہیں ،اوراللہ تعالیٰ اپنے بندے کی مدد فرماتے رہتے ہیں جب تک وہ اپنے بھائی کی مدد میں لگا رہتا ہے۔ ‘‘
نبی اکرم صلی اللہ علیہ وسلم نے اس بات کو پسند فرمایا ہے کہ آدمی کام کو خوش اسلوبی سے سرانجام دے، مثلاً وضو کرے تو اچھی طرح کرے، ایسے ہی نمازپڑھے تو اچھی طرح پڑھے۔ اسی طرح جو جائز کام اپنے ذمے لے، اسے اچھے طریقے سے پورا کرے، چنانچہ ارشادِ گرامی ہے:
’’عَنْ عَائِشَۃَ اَنَّ رَسُوْلَ اللہِ صَلَّی اللہُ عَلَيْہِ وَسَلَّمَ قَالَ: ’’ إِنَّ اللہَ جَلَّ وَعَزَّ يُحِبُّ إِذَا عَمِلَ اَحَدُکُمْ عَمَلًا اَنْ يُّتْقِنَہٗ۔‘‘ (شعب الإیمان للبیہقيؒ، الأمانات وما یجب من أدائھا إلی أھلھا، رقم:۴۹۳۱)
’’بے شک اللہ تعالیٰ پسند فرماتا ہے کہ جب تم میں سے کوئی شخص کوئی عمل کرے تو اس میں پختگی پیدا کرے۔‘‘
اس ارشادِ گرامی کی روشنی میں طبیب کے پاس اپنے شعبے اور جس مرض کا علاج کررہا ہے اس کی مہارت ہونا ضروری ہے۔
ایک دوسری جگہ بطور خاص طبیب کے لیے مہارت اور علمِ طب میں اس کی شہرت ہونا بھی ضروری قرار دیا گیا۔ ارشادِ گرامی ہے:
’’مَن تطبَّب ولم يُعلم منہ طِبٌّ قبل ذٰلک فہو ضامنٌ۔‘‘ (سنن ابن ماجۃ، کتاب الطب، باب من تطبب و لم یعلم منہ طب)
ترجمہ: ’’جو شخص اپنے آپ کو طبیب ظاہر کرکے علاج کرے، حالاں کہ اس سے پہلے اس کا طبیب ہونا معلوم نہ ہو (یعنی وہ فنِ طب کی مہارت میں مشہور نہ ہو اور علاج کرے،پھر اس کے علاج سے مریض کا کوئی عضو تلف ہوجائے، یا اس کا انتقال ہوجائے) تو وہ (مریض کا)ضامن ہوگا۔ ‘‘
اس حدیث پاک سے معلوم ہوتا ہے کہ علاج کرنے والے شخص کے پاس متعلقہ طبی معلومات ہونا ضروری ہیں۔ طبیب ِجاہل کے علاج کے نتیجے میں مریض کو لاحق ہونے والے ضرر کی ذمہ داری اسی طبیب پر عائد ہوگی، لہٰذا علاج کرنے والے شخص کا صحیح معلومات رکھنا اور ماہر ہونا ضروری ہے۔ اگر وہ ایسا نہیں ہے تو اسے علاج کرنے سے رک جانا ضروری ہے۔
طبیب کے لیے سچ کی پابندی کرنا بھی ضروری ہے۔ مرض کی درست تشخیص کرکے مریض اور اس کے متعلقین کو صحیح بات بتانا اور علاج کے دوران بھی جھوٹ سے بچنا ضروری ہے۔ مادی فوائد کے حصول کی خاطر جھوٹ بول کر مریض کو تشویش اور پریشانی میں ڈالنا یا بلا ضرورت لیبارٹری ٹیسٹ تجویز کرنا کبیرہ گناہ ہے:
’’ عن عبداللہِؓ قال: قال رسولُ اللہ صلی اللہ علیہ وسلم: ’’إِنَّ الصِّدْقَ يَہْدِيْ إِلَی الْبِرِّ، وَإِنَّ الْبِرَّ يَہْدِيْ إِلَی الْجَنَّۃِ، وَإِنَّ الرَّجُلَ لَيَصْدُقُ حَتّٰی يُکْتَبَ صِدِّيْقًا، وَإِنَّ الْکَذِبَ يَہْدِيْ إِلَی الْفُجُوْرِ، وَإِنَّ الْفُجُوْرَ يَہْدِيْ إِلَی النَّارِ، وَإِنَّ الرَّجُلَ لَيَکْذِبُ حَتّٰی يُکْتَبَ کَذَّابًا۔‘‘ (صحیح مسلم ،کتاب البروالصلۃ والآداب، باب قبح الکذب وحسن الصدق وفضلہ، رقم:۲۶۰۲)
’’بلاشبہ سچ آدمی کو نیکی کی طرف لے جاتا ہے اور نیکی جنت کی طرف لے جاتی ہے اور ایک شخص سچ بولتا رہتا ہے، یہاں تک کہ وہ صدیق کا لقب اور مرتبہ حاصل کر لیتا ہے اور بلاشبہ جھوٹ برائی کی طرف لے جاتا ہے اور برائی جہنم کی طرف لے جاتی ہے، اور ایک شخص جھوٹ بولتا رہتا ہے، یہاں تک کہ وہ اللہ کے یہاں بہت جھوٹا لکھ دیا جاتا ہے۔‘‘
طبیب کے پاس مریض کا راز ایک امانت ہوتا ہے، اس کی حفاظت ضروری ہے۔ مرض کی تاریخ (ہسٹری) لیتے ہوئے یا معائنہ کرتے ہوئے جو بھی طبیب کے علم میں آئے، وہ ایک امانت ہے۔ تاہم مریض کا نام لیے بغیر آگے تعلیم یا تحقیقی مقاصد سے اسے بیان کرنا جائز ہے۔ ایسے ہی جو ذمہ داری طبی میدان میں کام کرنے والوں کو سونپی گئی اسے بھی ایک امانت سمجھ کر ادا کرنا ضروری ہے۔
رسول اللہ صلی اللہ علیہ وسلم کے مندرجہ ذیل ارشادِ گرامی سے امانت داری کی اہمیت معلوم ہوتی ہے:
’’عن أبي ہريرۃ أن رسول اللہ صلی اللہ عليہ وسلم، قال: ’’آيۃُ المنافق ثلاث، إذا حدَّث کذَب، وإذا وعَدَ أخلفَ، وإذا اؤتُمِن خان۔‘‘ (صحیح مسلم، باب بیان خصال المنافق)
’’رسول اللہ صلی اللہ علیہ وسلم نے فرمایا کہ منافق کی تین نشانیاں ہیں: جب بات کرے توجھوٹ بولے، جب وعدہ کرے تو اس کے خلاف کرے اور جب اس کے پاس امانت رکھوائی جائے تو اس میں خیانت کرے۔‘‘
(جاری ہے)
