سوال

 ایک شخص جس کی قربانی کرنے کی گنجائش تقریبا تین ساڑھے تین لاکھ روپے تھی، اس نے ایک  بڑا جانور  اپنی استعداد سے بڑھ کر ساڑھے پانچ لاکھ روپے کا   اپنے جاننے والے سے خریدا اور بیچنے والے سے  یہ طے ہوا کہ  ساڑھے تین لاکھ روپے ابھی دوں گا اور باقی  پیسےآٹھ مہینے کے بعد دوں گا، پھر وہ جانور گھر پر لے آیا اور  دو چار دن میں وہ جانور   اتنا شدید بیمار ہوا کہ اس نے جانور کو واپس اسی بائع  کو دے دیا جس سے خریدا تھا  اور  بیچنے والے نے وہ جانور واپس بھی لے  لیا،  لیکن پھر وہ جانور بائع  کے پاس آدھے دن میں مر گیا،  اب  جس نے خریدا تھا وہ یہ  کہہ رہا ہے کہ اب مجھےآدھے  پیسے بیچنے والے  کو مروت میں  دینے پڑیں گے، تو کیا اس کے ذمہ بیچنے والے کو پیسے دینا  لازم ہے؟ (لیکن پیسے دینے کے بعد اس کے پاس  کچھ بھی نہیں بچے گا)اور کیایہ شخص  دوسرے جانور کی قربانی  کرے گا ؟اگر کرے گا تو  کتنی رقم والے جانور کی قربانی کرے گا ؟ ساڑھے پانچ لاکھ یا ساڑھے تین لاکھ یا اس کو اختیار ہے؟

جواب

واضح رہے کہ اگر کسی مال دار (غنی) صاحبِ نصاب شخص نے قربانی کی نیت سے جانور خریدا پھر وہ جانور بیمار ہوگیا تو دیکھا جائے گا کہ اگر بیماری کی وجہ سے جانور ایسا عیب دار ہوجائے جس کی قربانی نہیں ہوسکتی تو صاحبِ نصاب آدمی پر ضروری ہوگا کہ وہ عیب دار جانور کی جگہ پر کسی دوسرے جانور کی قربانی کرے، لیکن اگر جانور بیماری کی وجہ سے عیب دار نہ ہوا ہو اور اس کی قربانی کرنا جائز ہو تو اس صورت میں اس جانور کی جگہ دوسرا جانور کی قربانی کرنا ضروری نہیں ہوگا، دونوں صورتوں میں پہلے جانور کو بیچ کر دوسرا جانور خریدنا جائز  توہے، لیکن بلا ضرورت (یعنی دوسری صورت میں) قربانی کی نیت سے خریدے گئے جانور کو بیچنا مناسب نہیں ہے ، بہرحال دونوں صورتوں میں دوسرا جانور خریدتے وقت اس بات کا خیال رکھنا پڑے گا کہ وہ پہلے جانور سے کم قیمت والا نہ ہو، اگر دوسرا جانور پہلے کی قیمت سے کم قیمت میں خرید لیا تو دونوں جانوروں کی قیمت کے فرق کے بقدر رقم صدقہ کرنی پڑے گی۔

اور اگر کسی غریب (جس پر صاحب نصاب نہ ہونے کی وجہ سے قربانی واجب نہ ہو) نے قربانی کی نیت سے جانور خرید لیا اور پھر قربانی سے پہلے وہ جانور بیمار ہوگیا تو اس غریب  شخص پر چوں کہ قربانی کا یہ جانور خریدنے کی وجہ سے اس جانور کی قربانی لازم اور واجب ہوئی ہے؛ اس لیے اس شخص کے حق میں یہی جانور قربانی کرنے کے لیے  متعین ہے، لہٰذا اس غریب شخص کے  لیے اس جانور کو فروخت کر نا جائز ہی نہیں ہے، بلکہ چاہے یہ جانور  بیماری کی وجہ سے عیب دار بھی ہوجائے،  تب بھی اس شخص پر اسی جانور کی قربانی کرنا لازم ہے۔

لہٰذا صورتِ مسئولہ میں جب اس شخص نے وہ جانور واپس کردیا اور      بیچنے والے نے رضامندی  نے اسے قبول کرلیا اور اس شخص کے پیسے (ساڑھے تین لاکھ) واپس دے دیے تو اب اس کے ذمہ جانور کے  مالک کو کوئی رقم دینالازم نہیں  ہے، البتہ اگر وہ مروۃً بیچنے والے کو کچھ پیسے دے گا تو وہ اس کی  طرف سےتبرع اور احسان ہوگا،   چوں کہ یہ صاحب نصاب ہے تو اس کے ذمہ تقریبا ساڑھے پانچ لاکھ کے  جانور کی قربانی کرنا لازمی ہے؛ کیوں کہ مالدار صاحب نصاب کے حق میں خریدے ہوئے جانور کی مالیت متعین ہوجاتی ہے اور  اگر اس سے کم رقم کے جانور کی قربانی کرتاہے، تو   ساڑھے پانچ لاکھ  تک کی بقیہ رقم پر صدقہ کرنا واجب ہوگا، ہاں، اگر اس کے پاس ساڑھے تین لاکھ سے زائد رقم نہیں ہے تو ساڑھے تین لاکھ کے جانور کی قربانی کرنے کی گنجائش ہوگی۔