سوال

زید نے بکر کے پاس موبائل امانت   رکھوایا تھا،بکر موبائل  بائیک پر استعمال   کررہا تھا کہ کوئی چھین  کر لے گیا ، اب یہ معلوم نہیں کہ موبائل  کال ریسیو  کرنے کے  لیے استعمال کیا   یا   ایسا ہی بلا ضروت استعمال کیا ، اب بکر پر ضمان ہے یا نہیں؟

            نیز اگر علاقہ ایساہو جہاں عام طور پر  موبائل چوری یا لوٹ جانے    کا خطرہ ہو   تو  ایسے علاقے میں جانا تعدی شمار  ہوگا   یا نہیں؟

مزید واضح   ہو  مندرجہ ذیل صورتوں میں سے کون سی صورت تعدی بنفسہ ہوگی اور   کون سی نہیں،ایک یہ کہ  بکر نے اپنے کام سے موبائل ہاتھ میں رکھا جس کی وجہ سے لٹیرا   لےکر بھاگ گیا۔

بکر نے زید سے کہا کہ میں نے آپ  کی  کال سننے کے لیے موبائل جیب سے نکالا     اور زید کہتا ہے کہ  نہیں  آپ نے کیوں ہاتھ میں رکھا   آپ قصور وار ہو؟

جواب

صورتِ مسئولہ  کا حکم یہ ہے کہ اگر زید نے بکر کو  موبائل  استعمال    کرنے کی   اجازت دی    تھی اور اسی بنیاد پر امین ( بکر  )  نے موبائل  استعمال کیا اور اس کی حفاظت   میں کوئی کوتاہی بھی نہیں کی  اور اس کے باوجود مذکورہ حادثہ میں  موبائل   ضائع ہوگیا  تو یہ اصل مالک (زید) کی ملک سے ضائع  شمار ہوگا،لہذا  امین(بکر) پر شرعاًکوئی ضمان  واجب نہیں  ہوگا ۔

اور اگر زید نے بکر کو موبائل    استعمال کرنے  کی اجازت نہیں  دی   تھی اس کے باوجود بکر نے موبائل استعمال کیا اور اس دوران موئل کو چھین لیا گیا، تو یہ بکر کی طرف سے  امانت میں خیانت اور   تعدی کی وجہ سے بکر ضامن ہوگااور اس پر موبائل یا اس کی قیمت ادا کرنا لازم ہوگا ۔

حدیث شریف میں ہے:

"عن عمرو بن شعیب عن أبیہ، عن جدہ عن النبي ﷺ قال: لیس علی المستعیر غیر المغل ضمان، ولا علی المستودع غیر المغل ضمان۔"

(سنن الدارقطني، البیوع، دارالکتب العلمیۃ بیروت۳/۳۶، رقم:۲۹۳۹)

شرح المجلۃ لرستم باز میں ہے:

"الودیعۃ أمانۃ في ید المودع، فإذا ہلکت بلا تعد منہ، وبدون صنعہ وتقصیرہ في الحفظ لا یضمن۔"

(شرح المجلۃ رستم باز مکتبہ إتحاد دیوبند            ۱/۴۳۱، رقم المادۃ:۷۷۷)

مجمع الانہر میں ہے:

    "فلا یضمن أي لا یضمن المودع المودیعۃ بغیر تعد بالہلاک، سواء أمکن من التحرز عنہ أو لا -إلی- لقولہ علیہ السلام: لیس علی المستودع غیر المغل ضمان۔"

                                                                                                                                                                                                                                        (مجمع الأنہر، کتاب الودیعۃ، دارالکتب العلمیۃ بیروت۳/۴۶۸)

ہندیہ میں ہے:      

"وأما حکمہا فوجوب الحفظ علی المودع وصیروۃ المال أمانۃ في یدہ ووجوب أدائہ عند طلب مالکہ۔"

 (ہندیۃ،۴/۳۳۸)

فقط واللہ اعلم