سوال

میں اپنی جائیدادکواپنی زندگی میں اپنےاولادکےدرمیان تقسیم کرناچاہتاہوں،میرےورثاء میں میرے والدمحترم،پانچ بیٹےاوردوبیٹیاں ہیں،جب کہ میری بیوی کاانتقال ہوچکاہے،اورمیرےجائیدادکی کل مالیت ایک کروڑ چالیس لاکھ روپےہے۔

سوال یہ ہے کہ مذکوہ جائیدادکس طرح تقسیم ہوگی؟

جواب

واضح رہے کہ مالک اپنی زندگی میں اپنے مال وجائیداد کاخودہی مالک ہوتاہے،اوراپنےمال میں ہرطرح کےجائزتصرف کاحق رکھتاہے،لہذااگروہ اپنی زندگی میں اپنےمال وجائیدادکوتقسیم کرناچاہےتوکرسکتاہے،حدیث مبارکہ کی روشنی میں زندگی میں تقسیم کاطریقہ کاریہ ہے کہ بقدرضرورت اپنےلئے رکھ لےتاکہ کل کومحتاجی نہ ہو،اوربوقت ضرورت کام آئے،چوں کہ یہ تقسیم وراثت نہیں بلکہ ہبہ یعنی گفٹ ہے،لہذااس میں شریعت نےوراثت کی طرح کوئی خاص مقدارمتعین نہیں کیاہے،لہذاسائل مناسب ساحصہ اپنےوالدکودیدے،بقیہ تمام اولادیعنی بیٹوں اوربیٹیوں میں برابربرابرتقسیم کردےتاکہ اولادکےدرمیان عدل وانصاف قائم رہے،اورکسی کوشکایت بھی نہ ہو،البتہ اگراولادمیں سے کسی کواس کی زیادہ دین داری ،فرمانبرادی یامحتاجی کی بناء پرکچھ زائددیناچاہےتودےسکتاہے۔

مشکاۃ شریف میں ہے:

"عن النعمان بن بشير أن أباه أتى به إلى رسول الله صلى الله عليه وسلم فقال: إني نحلت ابني هذا غلاما فقال: «أكل ولدك نحلت مثله؟» قال: لا قال: «فأرجعه» . وفي رواية: أنه قال: «أيسرك أن يكونوا إليك في البر سواء؟» قال: بلى قال: «فلا إذن» . وفي رواية: أنه قال: أعطاني أبي عطية فقالت عمرة بنت رواحة: لا أرضى حتى تشهد رسول الله صلى الله عليه وسلم فأتى رسول الله صلى الله عليه وسلم فقال: إني أعطيت ابني من عمرة بنت رواحة عطية فأمرتني أن أشهدك يا رسول الله قال: «أعطيت سائر ولدك مثل هذا؟» قال: لا قال: «فاتقوا الله واعدلوا بين أولادكم." 

(باب العطايا، الفصل الاول، ج:2، ص:909، ط:المكتب الإسلامي)

"ترجمہ:حضرت نعمان ابن بشیر  رضی اللہ عنہ سے روایت ہے کہ (ایک دن ) ان کے والد (حضرت بشیر رضی اللہ عنہ) انہیں رسول کریمﷺ کی خدمت میں لائے اور عرض کیا کہ میں نے  اپنے اس بیٹے کو ایک غلام ہدیہ کیا ہے، آپ ﷺ نے فرمایا : کیا آپ نے اپنے سب بیٹوں کو اسی طرح ایک ایک غلام دیا ہے؟، انہوں نے کہا :  ”نہیں “، آپ ﷺ نے فرمایا: تو پھر (نعمان سے بھی ) اس غلام کو واپس لے لو۔ ایک اور روایت میں آتا ہے کہ ……  آپ ﷺ نے فرمایا: اللہ تعالی سے ڈرو اور اپنی اولاد کے درمیان انصاف کرو۔"

(مظاہر حق،  باب العطایا، ج:، ص:193،ط: دارالاشاعت)

فقط والله اعلم