سوال

تشہدمیں پڑھے جانے والے "التحیات " کے الفاظ کا اصل پس منظر کیا ہے؟ اوریہ الفاظ کس واقعے سے متعلق ہیں، اور اور اس میں کن کن مختلف مقامات پر اللہ، نبی ﷺ اور فرشتوں کا ذکر ہے؟

جواب

التحیات میں پڑھےجانےوالےکلمات کےپس منظر کے متعلق مشہورتویہ ہے کہ  معراج کے موقع پر اللہ اور رسول اللہ صلی اللہ علیہ وسلم کے درمیان مکالمہ ہوا تھا،تاہم اس پس منظرکاثبوت کسی معتبرسندسےنہیں ملتا،بعض محدثین مثلاً ملا علی قاری رحمہ اللہ نے مشکاۃ المصابیح کی شرح مرقاۃ المفاتیح میں بغیر سند کے ابن ملک کے حوالہ سے مذکورہ واقعہ بصیغہ مجہول نقل کیا ہے، اورعلامہ بدر الدین عینی رحمہ اللہ  نے بھی شرح سننِ ابی داؤد میں اس واقعہ کی طرف بلا سند اشارہ کیا ہے، اسی طرح حضرت بنوری رحمہ اللہ نے بھی اس واقعہ کومعارف السنن میں ملاعلی قاری کےحوالے سےنقل فرمایاہے،تاہم اس واقعہ کو تفصیل و اختصار کے ساتھ نقل کرنے والوں میں سے کسی نے بھی اس کی سند بیان نہیں کی ہے، لہذا اس واقعہ کو بیان نہیں کرنا چاہیے، اگر بیان ہی کرنا ہو تو مذکورہ اہلِ علم کے حوالے سے نیز سند نہ ہونے کی صراحت کے ساتھ بیان کیا جائے۔ 

"التحیات للہ والصلوات والطیبات "میں اللہ تعالیٰ کا ذکرہے،"السلام عليك أيها النبي ورحمة الله وبركاته"میں نبی کریم ﷺ کا ذکرہے،اور "السلام علينا وعلى عباد الله الصالحين"میں فرشتوں اور نیک بندوں کا ذکرہے۔

مرقات المفاتیح میں ہے:

"قال ابن الملك: روي: أنه صلى الله عليه وسلم لما عرج به أثنى على الله تعالى بهذه الكلمات فقال الله تعالى:السلام عليك أيها النبي ورحمة الله وبركاته، فقال عليه السلام: السلام علينا وعلى عباد الله الصالحين، فقال جبريل: أشهد أن لا إله إلا الله، وأشهد أن محمدا عبده ورسوله، وبه يظهر وجه الخطاب، وأنه على حكاية معراجه عليه السلام في آخر الصلاة التي هي معراج المؤمنين."

(کتاب الصلاۃ،باب التشھد،ج:2،ص:732،ط:دار الفكر، بيروت )

شرح سنن ابی داودللعینی میں ہے:

"السلام الذي سلمه الله تعالى عليك ليلة المعراج."

(کتاب الصلاۃ،باب التشھد،ج:4،ص:238،ط:الرشد - الرياض)

معارف السنن میں ہے:

"ذکر بعض الحنفیة أنه صلى الله عليه وسلم لما عرج به أثنى على الله تعالى بهذه الكلمات فقال الله تعالى: السلام عليك أيها النبي ورحمة الله وبركاته، فقال عليه السلام: السلام علينا وعلى عباد الله الصالحين، فقال جبريل: أشهد أن لا إله إلا الله، وأشهد أن محمدا عبده ورسوله. حكاه علي القاري عن ابن عبدالملك في المرقات.... قال الشیخ لم أقف علی سند هذہ الروایات."

(کتاب الصلاۃ،باب التشھد،ج:3،ص:87،ط:مجلس الدعوۃوالتحقیق )

فقط واللہ اعلم