سوال

عائزل / آئزل نام رکھنا کیسا ہے ؟

جواب

"عائزل"  اور "آئزل" یہ دونوں نام کسی بھی لغت (عربی، فارسی، اردو، انگلش) میں نہیں ملے، مذکورہ تلفظ کے اعتبار سے یہ دونوں نام مجہول المعنی ہونے کی وجہ سے رکھنا درست نہیں ہے، باقی بچوں کے ناموں کے لیے بہتر یہ ہے کہ ایسے نام رکھے جائیں جن سے اسلام کے تشخص کا اظہار ہو، اس کے لیے صحابہ /صحابیات رضوان اللہ علیہم اجمعین، تابعین /تابعات رحمہم اللہ کے ناموں پر نام رکھا جائے۔ جس کے  لیے ہمارے ویب سائٹ اور ایپلی کیشن میں " اسلامی نام" کے عنوان سے ایک آپشن موجود ہے جس میں سے آپ اپنے مرضی کے نام کا انتخاب کرسکتے ہیں۔

اور اگر سائل کا مقصد  ایزل (Ayzal) نام کے بارے میں معلوم کرنا ہے تو اس کا حکم یہ ہے:

اِیزِل (الف اور زاء کے  نیچے زیر کے ساتھ)  اس لکڑی کو  کہتے ہیں جو تصویر سازی میں استعمال ہوتی ہے، معنی کے لحاظ سے یہ نام مناسب نہیں ہے، بہتریہ ہےکہ لڑکی کےلیےازواج مطہرات یاصحابیات رضوان اللہ علیھن اجمعین یاکسی نیک خاتون یاکوئی بامعنی اچھانام رکھاجائے۔

مشکوۃ شریف میں ہے:

"وعن أبي سعيد وابن عباس قالا: قال رسول الله صلى الله عليه وسلم: من ولد له ولد فليحسن اسمه وأدبه فإذا بلغ فليزوجه فإن بلغ ولم يزوجه فأصاب إثما فإنما إثمه على أبيه."

(كتاب النكاح،باب الولي،ج: 2، ص :279 ط: رحمانية)

ترجمہ:"اور حضرت ابوسعیداور حضرت ابن عباس رضی اللہ عنہماکہتے ہیں کہ رسول کریم صلی اللہ علیہ وسلم نے فرمایا"جس شخص کے ہاں لڑکا پیدا ہوتو چاہیے کہ وہ اس کا اچھا نام رکھے اور اسے نیک ادب سکھائے (یعنی اسے شریعت کے احکام وآداب اور زندگی کے بہترین طریقے سکھائے تاکہ وہ دنیا وآخرت میں کامیاب وسربلند ہو)اور پھر جب وہ بالغ ہوجائے تو اس کا نکاح کردے،اگر لڑکا بالغ ہو(اور غیر مستطیع ہو)اور اس کاباپ (اس کا نکاح کرنے پر قادر ہونے کے باوجود) اس کا نکاح نہ کرے اور پھر وہ لڑکا برائی میں مبتلا ہوجائے(یعنی جنسی بے راہ روی کا شکار ہوجائے )تو اس کا گناہ باپ پر ہوگا۔"(مظاہرِ حق)

سنن أبی داود میں ہے:

"عن أبي الدرداء، قال: قال رسول الله صلى الله عليه وسلم: «إنكم تدعون يوم القيامة بأسمائكم، وأسماء آبائكم، فأحسنوا أسماءكم."

(كتاب الأدب، باب في تغيير الأسماء،ج:4،ص:287،ط: المكتبة العصرية)

ترجمہ:"رسول اللہ صلی اللہ علیہ وسلم نے فرمایا کہ تم قیامت کے دن اپنے اور اپنے آباء کے ناموں سے پکارے جاؤ گے، لہٰذا تم اچھے اچھے نام رکھو۔"

فقط واللہ اعلم

لڑکیوں کے اسلامی نام کے لیے درج ذیل لنک پر کلک کریں۔

لڑکیوں کے اسلامی نام