سوال

1.کسی بھی بہن کا اپنے بھائیوں کے حق میں اپنے باپ کی میراث سے دستبردار ہونے کا شرعی طریقہ کیا ہے ؟

2.کوئی بہن کسی بھی صورت میں لکھ کردےدے کہ میں اپنے باپ کی میراث لینے سے دستبردار ہوں تو کیا یہ دستبرداری معتبر ہوگی یا نہیں ؟

3.جو شخص اپنی بہنوں کو اپنے باپ کی میراث سے حق نہیں دیتاتو کیاایسا شخص  مستقل بنیادوں پر امامت و خطابت کے فرائض انجام دے سکتاہے؟نیز یہ بھی واضح فرمادیں کہ ایسے شخص کے پیچھے نماز پڑھنا جائز ہے یا نہیں؟

جواب

واضح رہے کہ  کسی شخص کے انتقال کے بعد اس کے ترکہ میں اس کے تمام ورثاء کا حق متعلق ہوجاتاہے اور کسی وارث کو اس کاحصہ نہ دینا اور محروم کرنا شرعاً جائز نہیں ہوتا،وارث کو اس کے حصۂ میراث سے محروم کرنے اور اس کا حق دبالینے پر احادیث مبارکہ میں بڑی وعیدیں آئی ہیں:

’’حضرت سعید  بن زید رضی اللہ تعالیٰ عنہ فرماتے ہیں رسول اللہ صلی اللہ علیہ وسلم نے فرمایا: جو شخص( کسی کی ) بالشت بھر زمین  بھی  از راہِ ظلم لے گا،قیامت کے دن ساتوں زمینوں میں سے اتنی ہی  زمین اس کے گلے میں   طوق  کے طور پرڈالی  جائے گی‘‘،  ایک اور حدیثِ مبارک میں ہے: ’’حضرت انس رضی اللہ تعالیٰ عنہ فرماتے ہیں : رسول اللہ صلی اللہ علیہ وسلم نے فرمایا: جو شخص اپنے وارث کی  میراث کاٹے گا،(یعنی اس کا حصہ نہیں دے گا) تو اللہ تعالیٰ قیامت کے دن اس کی جنت کی میراث کاٹ لے گا(یعنی اسے جنت سے محروم کردے گا)۔‘‘

مذکورہ تمہید کے بعد آپ کے سوالات کے جوابات درج ذیل ہیں:

1.میراث ایک جبری حق ہے جو شرعا ورثاء کو دیاگیا ہے،اگر کوئی وارث یہ کہے کہ میں اپنا حصہ نہیں لیتا تواس کے صرف اتنا کہنے سے اس کاحق  ختم نہیں ہوتا،شرعا اپنا حصہ لینا ضروری ہے، ہاں حصہ لینے کے بعد کوئی وارث(مثلا بہن ) اپنا حصہ دوسرے وارث(مثلا بھائی) کو اپنی خوشی سے قبضہ کےساتھ دےدے تو یہ اس کی طرف سے ہدیہ اور تبرع ہوگا ،اس صورت میں جس کو بھی یہ ہدیہ کیا ہو گا وہ اس کا مالک بن جائے گا۔

2.بہن کا یہ لکھ کر دینا کہ  ’’میں اپنے باپ کی میراث سے دستبردار ہوں ‘‘، یہ دست برداری شرعاً معتبر نہیں ہے،اس سے بہن کا میراث کا حصہ و حق ختم نہیں ہوگا۔

3. مذکورہ تمہید سے معلوم ہوچکا کہ بہنوں کو میراث کا حصہ نہ دینا گناہِ کبیرہ ہے ،ایسا شخص شرعاً فاسق ہے ،لہذا اگروہ اپنےاس فعل سے توبہ نہیں کرتا اور بہنوں کو میراث کا حصہ نہیں دیتا  اور نہ ہی دینے کا ارادہ ہوتو ایسا کرنا غصب ہے۔ ایسے شخص کو  مستقل امام وخطیب مقرر نہیں کرنا چاہئے،لیکن کسی جگہ پر اگر ایسا شخص جماعت کی امامت کرواتا ہے تو اس کے پیچھے نماز اداہوجائےگی اور جماعت کا ثواب مل جائےگا،البتہ متقی صحیح العقیدۃ امام کے پیچھے نماز پڑھنے سے جتنا ثواب ملتا ہے ،اتنا ثواب نہیں ملے گا ۔