سوال

"نیکزالٹ"  ایک کرپٹو کرنسی ہے،  اس کا ریٹ روزانہ کی بنیاد پر بڑھتا یا کم ہوتا رہتا ہے،  کیا میں اسے خرید کر جب وہ کم ریٹ پر ہو  اور ریٹ بڑھنے پر بیچ کر منافع حاصل کر سکتا ہوں،  یہ حلال ہوگا یا نہیں یہ سود میں تو نہیں آتا؟

جواب

صورتِ  مسئولہ میں کرپٹو   کرنسی (بٹ کوائن  یا اس کے علاوہ دیگر)  محض  فرضی  کرنسی ہے، اس میں حقیقی کرنسی کے بنیادی اوصاف اور شرائط بالکل موجود نہیں ہیں، لہذا موجودہ  زمانے میں " کوئن" یا "ڈیجیٹل کرنسی" کی خرید و فروخت کے نام سے انٹرنیٹ پر اور الیکٹرونک مارکیٹ میں جو کاروبار چل رہا ہے وہ حلال اور جائز نہیں ہے، وہ محض دھوکا ہے، اس میں حقیقت میں کوئی مادی چیز نہیں ہوتی، اور اس میں قبضہ بھی نہیں ہوتا صرف اکاؤنٹ  میں کچھ عدد آجاتے ہیں، اور یہ فاریکس ٹریڈنگ کی طرح سود اور جوے کی ایک شکل ہے، اس لیے " بٹ کوائن" یا کسی بھی " ڈیجیٹل کرنسی" کے نام نہاد کاروبار میں پیسے لگانا اور خرید و فروخت میں شامل ہونا جائز نہیں ہے۔

(ماخوذ از  تجارت کے مسائل کا انسائیکلوپیڈیا: 2/ 92)

فقط واللہ اعلم