سوال

میں نے ڈیجیٹل مارکیٹنگ کا کام شروع  کیا ہے میں مارکیٹنگ کے لیے انسانی تصویر اور ویڈیوز استعمال کی جاتی کیا یہ چیز صحیح ہے یا نہیں؟  اور ڈیجیٹل تصویر کے بارے میں علما کی رائے؟۔

جواب

صورتِ مسئولہ میں تصاویر کا استعمال کسی صورت جائز نہیں،ڈیجیٹل تصویر اور ویڈیو سے متعلق   ہمارے ادارے (جامعہ علوم اسلامیہ، علامہ محمد یوسف بنوری ٹاؤن، کراچی) کا فتویٰ یہ  ہی ہے کہ یہ تصویر ہے اور  جس طرح کاغذ پر بنی ہوئی جان دار کی تصویر حرام ہے، اسی طرح  یہ بھی حرام ہے۔ اس لیے کہ  جان دار کی تصویر کی حرمت سے متعلق نصوص عام ہیں، نیز ہمارے اکابر  نے  جان دار کی تصویر سازی کو مطلقًا ناجائز قرار دیا ہے، خواہ تصویر بنانے کے لیے کوئی آلہ استعمال کیا جائے، اور قریب زمانے تک برصغیر کے اہلِ حق علماء کا تقریبًا اس پر اتفاق رہا ہے، بہرحال اگر اس مسئلے میں اہلِ علم کی آراء کا اختلاف معتبر مانا جائے تو بھی جان دار کی ڈیجیٹل تصویر کے ناجائز ہونے کو ہی ترجیح حاصل ہوگی، اس لیے کہ جس مسئلے میں جائز و ناجائز کا اختلاف ہو، وہاں ترجیح حرمت کو حاصل ہوتی ہے۔

باقی فی نفسہ کاروبار جائز ہے یا نہیں، اس کا حکم کاروبار کی تفاصیل پر منحصر ہے۔

"عن عبد الله بن مسعود قال: سمعت رسول الله صلى الله عليه وسلم يقول: «أشد الناس عذاباً عند الله المصورون»."

(مشكاة المصابيح ،2/385، باب التصاویر، ط: قدیمي/الصحیح لمسلم،3/1667،  رقم الحدیث: 2107، ط: دار إحیاء التراث العربي)

ترجمہ: حضرت عبداللہ بن مسعودؓ کہتے ہیں کہ میں نے رسول کریمﷺ  کویہ فرماتے ہوئے سنا کہ ”اللہ تعالیٰ کے ہاں سخت ترین عذاب کا مستوجب، مصور (تصویر بنانے والا)ہے“۔

(مظاہر حق جدید،  230/4  ، ط: دارالاشاعت)

ایک اور حدیثِ مبارک  میں ہے:

"عن ابن عباس قال: سمعت رسول الله صلى الله عليه وسلم يقول: «كل مصور  في النار يجعل له بكل صورة صورها نفسا فيعذبه في جهنم."

مشكاة المصابيح ، 2/385، باب التصاویر، ط: قدیمي)

ترجمہ: حضرت ابن عباسؓ کہتے ہیں کہ  میں نے رسول کریم ﷺ کو یہ فرماتے  ہوئے سنا کہ” ہر مصور دوزخ میں ڈالا جائے گا، اور اس کی بنائی  ہوئی ہر تصویر کے بدلے ایک شخص پیدا کیا جائے گا جو تصویر بنانے والے کو دوزخ میں عذاب دیتا رہے گا“۔

(مظاہر حق جدید،4/230، ط: دارالاشاعت)

ایک اور حدیثِ مبارک  میں ہے:

"وعن عائشة عن النبي صلى الله عليه وسلم قال: «أشد الناس عذاباً يوم القيامة الذين يضاهون بخلق الله»."

(مشكاة المصابيح ، 385/2، باب التصاویر، ط: قدیمي/ صحیح البخاري 880/2، ط: قدیمي)

ترجمہ: حضرت عائشہ ؓ  ، رسول کریمﷺ سے روایت کرتی ہیں کہ  آپ ﷺ نے فرمایا: قیامت کے دن سب لوگوں سے زیادہ سخت عذاب  ان لوگوں کو ہوگا جو تخلیق میں اللہ تعالیٰ کی مشابہت اختیار کرتے ہیں۔

(مظاہر حق جدید ،229/4، ط: دارالاشاعت)

فقط واللہ اعلم