سوال

ایک قوم میں  مہر کے بارے میں یہ رواج ہے کہ وہ مہر پانچ لاکھ روپے مقرر کرتے ہیں،  اگر کوئی اس سے زیادہ مہر مقرر کرنا چاہے  تو قوم والے اس سے بائیکاٹ کرتے ہیں اور اس کے ساتھ خوشی اور غم میں  شریک نہیں ہوتے اور نہ ہی اس کے جنازے میں شرکت کرتے ہیں اور اس گھر کا کچھ حصہ بھی اس کو بتلا کر گرا دیتے ہیں ۔  کیا  کسی خاص قوم کے لیے مہر کی مخصوص مقدار پر پابندی کرنا شرعاً کیسا ہے؟

جواب

واضح رہے کہ  شریعت میں مہر کی زیادہ سے زیادہ کوئی مقدار متعین نہیں ہے، اور کم از کم مقدار  دس درہم ہے ، بلکہ مہر کی   ادائیگی کا تعلق شوہر کی استطاعت پر موقوف ہے، لہذا      اگر  کوئی شخص زیادہ مہر کی استطاعت  رکھتا ہے اور وہ ادا کرنا چاہتا ہے تو شرعاً ایسا کرنے کی اسے اجازت ہے ، کسی بھی شخص یا قوم کا ان سے مہر کی زیادتی کی وجہ سے قطع تعلق کرنا ان  کی خوشی اور غم میں  شریک نہ ہونا شرعاً درست نہیں، ایسے عمل سے احتراز کرنا ضروری ہے۔

 مسلم شریف  میں ہے:

"عن أبي سلمة بن عبد الرحمن، أنه قال: سألت عائشة زوج النبي صلى الله عليه وسلم: كم كان صداق رسول الله صلى الله عليه وسلم؟ قالت: «كان صداقه لأزواجه ثنتي عشرة أوقية ونشاً»، قالت: «أتدري ما النش؟» قال: قلت: لا، قالت: «نصف أوقية، فتلك خمسمائة درهم، فهذا صداق رسول الله صلى الله عليه وسلم لأزواجه."

(کتاب النکاح ،باب الصداق، ج: 4 ،ص: 144، رقم الحدیث: 1426، ط: دارالطباعة العامرۃ)

مرقاۃالمفاتیح میں ہے:

"(وعن عائشة) رضي الله عنها (قالت: قال النبي صلى الله عليه وسلم الله عليه وسلم: إن أعظم النكاح بركة ) أي: أفراده وأنواعه (أيسره) أي: أقله أو أسهله، (مؤنة) أي: من المهر والنفقة للدلالة على القناعة التي هي كنز لا ينفد ولا يفنى".

( كتاب النكاح، ج: 5، ص: 2049 ، ط: دار الفكر، بيروت)