سوال

ایک لڑکی کا نکاح 2020 ء میں ہوا،ڈھائی مہینے تک ساتھ رہے،پھر  درمیان میں کچھ ناچاقی ہوئی اور لڑکی والدین کے گھر بیٹھ گئی، لڑکے والوں نے پیغام بھجوایاکہ سامان اٹھاؤ،وہ ہم نےاٹھایا،اب کسی نے ان کو یہ بات بتائی ہے کہ طلاق نہ دوتاکہ وہ خلع نامہ پر مجبور ہوجائے اور مہرمعاف کرلے،وہ لوگ مہر نہ دینے کے لیے بہانہ کررہےہیں، لڑکی کو طلاق نہیں دے رہے ہیں،تاکہ وہ خلع لینے پر مجبور ہوجائے،اب شریعت اس بارے میں کیا کہتی ہے کہ شوہر کے اس فعل کا کیاحکم ہے؟

وضاحت : نکاح کے وقت لڑکی والوں کی طرف سے یہ شرط لگائی گئی تھی کہ لڑکی کی والدہ چوں کہ بیمار ہے ،لہذا وہ رات کےوقت اپنے شوہر کے پاس یعنی  سسرال کےگھر پررہے گی،صبح دس گیارہ بجے سے شام  تک اپنی والدہ کی خدمت کے لیےاس کے پاس رہے گی،ڈھائی مہینے تک اس شرط پر شوہر کی طرف سے عمل ہوتا رہا ،لیکن بعد میں شوہرنے اپنی بیو ی کو ہردن میکہ  جانے سے منع کیا،اسی پر دونوں کےدرمیان  ناچاقی  ہوئی ، اور لڑکی نے کہا کہ اب میں سسرال  نہیں جاؤں گی ،جس کے بعد سے اب تک وہ  والدین کے گھر   بیٹھی ہوئی  ہے ، شوہر کے پاس نہیں آرہی ہے۔

جواب

 صورتِ مسئولہ میں سب سے پہلے  میاں بیوی کو چاہیے کہ شریعتِ مطہرہ کی بتائی ہوئی حدود کے دائرہ میں   جہاں تک  دونوں کے لیے ایک ساتھ رہناممکن ہو  ،ایک ساتھ رہنا چاہیے ،بلاکسی وجہ کے طلاق یا خلع کی طرف اقدام نہیں کرنا چاہیے  ،کیوں  کہ طلاق یا خلع اللہ رب العزت کے نزدیک مباح چیزوں میں سب سے مبغوض وناپسندیدہ ہے، اس لیےاب بھی اگر میاں بیوی  دونوں کےلیے اپنی ناچاقی ختم کرکےایک ساتھ رہنااور گھر بسانا  ممکن ہے تو ایک ساتھ رہ کر ازدواجی زندگی کو بہتر سے بہتر بنائیں ،اور ہر ایک دوسرے کےحقوق واجبہ کا خیال کرے،  لیکن اگر   میاں بیوی کی ناچاقی اس حد تک پہنچ چکی ہے کہ اس  کی وجہ سے دونوں کے لیے    شریعتِ مطہرہ کی بتائی ہوئی حدود کے دائرہ میں  ایک ساتھ رہنا مشکل  ہوگیا ہے  تو  میاں بیوی دونوں کے  خاندان کے  افراد کو چاہیے کہ مذکورہ  معاملہ کوسلجھا کر  حد درجہ نباہ کی کوشش کریں، اگر  نباہ کی کوئی صورت ممکن نہ ہو اوریہ یقین ہوجائے کہ اب   دونوں میں گزر بسر ممکن نہیں  تو ایسی صورت میں لڑکی    طلاق  یا خلع کے ذریعہ شوہر سے خلاصی حاصل کرسکتی ہے۔

  صورتِ مسئولہ میں نکاح کےوقت لڑکی والوں نے جوشرط رکھی تھی کہ لڑکی صبح دس بجے سے شام تک اپنی بیمار والدہ کی خدمت کےلیے  والدہ کے پاس رہے گی تو اگر لڑکے نے اس پر رضامندی ظاہر کی تو دیانۃً اسے اس کی پاسداری کرنی چاہیےاور بیوی کو اپنی والدہ کی تیمارداری کی سہولت دینی چاہیے،لیکن اگر شوہر اس سہولت دینے کوتیار نہیں تو چوں کہ یہ بیوی کے حقوقِ واجبہ میں سے نہیں ،اس لیے شوہر کو قضاء مجبور نہیں کیا جاسکتا، بلکہ یہی کہا جائے گاکہ شوہر نے وعدہ کے ساتھ مذکورہ رعایت جو دی تھی وہ ختم کردی ،لیکن مذکورہ صورت میں  لڑکی نےشوہر کی  اطاعت کے بجائے اس پر اپنے شوہر کے ساتھ ناچاقی کی ہے اور   اپنے والدین کے گھر بیٹھ گئی ہے اور شوہر کے پاس نہیں آرہی ہے،جس کی بناء پر اب  شوہر  طلاق نہیں دےرہا ہے ،بلکہ  مہر معاف کرانے کے لیے رضامندی سے  خلع دے رہا ہے تو ایسی صورت میں  شوہر کے لیے  مہر کےمعاف کرانے پر خلع  دینا درست ہے ۔

فتاوی ہندیہ میں ہے:

"إذا ‌تشاق ‌الزوجان وخافا أن لا يقيما حدود الله فلا بأس بأن تفتدي نفسها منه بمال يخلعها به فإذا فعلا ذلك وقعت تطليقة بائنة ولزمها المال كذا في الهداية.