سوال

مرنےکے بعدانسان قبرمیں رہتاہے یاجنت میں جاتاہے؟

جواب

مرنےکے بعد انسان کا جسم  قبرمیں رہتاہے،جبکہ روح علیین یا سجین سے مربوط ہونے کے باوجود قبر میں رکھے ہوئے جسدعنصری سے متعلق بھی ہوتی ہے۔ باقی انسان کو  مرنے کے فورابعد  جنت یا دوزخ میں نہیں داخل کیا جاتا،بلکہ جنت ودوزخ میں قیامت کے دن حساب و کتاب کے بعد ہی داخل کیا جائےگا،البتہ  قبر میں  رہنےکازمانہ ”عالم  ِبرزخ“کہلاتاہے،اس میں فرماں بردار ایمان والوں کو جنت کی نعمتوں کے اثرات محسوس ہوں گے،جب کفار اور نافرمان مسلمانوں کو عالم برذخ میں دوذخ کے عذاب کے اثرات عذاب قبر کی شکل میں پہنچیں گے۔

قرآن ِکریم میں ہے:

"النَّارُ يُعْرَضُونَ عَلَيْهَا غُدُوّاً وَعَشِيّاً وَيَوْمَ تَقُومُ السَّاعَةُ أَدْخِلُوا آلَ فِرْعَوْنَ أَشَدَّ الْعَذَابِ" (سورۃ غافر:46)

ترجمہ :ترجمہ: ’’ وہ لوگ  (برزخ میں) صبح اور  شام آگ کے سامنے  لائے جاتے  ہیں، اور جس  روز  قیامت قائم ہوگی (حکم ہوگا) فرعون والوں کو (مع فرعون کے) نہایت سخت آگ میں داخل کرو۔‘‘  (بیان القرآن)

اس سلسلہ میں مزید تفصیل جاننے کے لیے مولانا سرفراز خان صفدر صاحب رحمہ اللہ کی کتا ب" تسکین الصدور في أحوال الموتي في البرزخ والقبور "کا مطالعہ مفید رہے گا۔

فقط واللہ اعلم