سوال

 الحمداللہ میری بیٹی  پیدا ہوئی ہےاور اس کا نام ”مومنہ“  رکھا ہے اور اب کسی نے اہلیہ  کو کہا کہ  اس  کا نام ”مومنہ“  رکھنا صحیح نہیں ہے،  بچی کا نام ”ماہم“  رکھیں، آپ  راہ نما ئی کریں کون سا نام بہترین ہے ؟

جواب

مومنہ  کا معنی ہیں:  ایمان  والی، یقین کرنے  والی، تصدیق کرنے والے،  یہ  نام  رکھنا  جائز  ہے۔

باقی ”ماہم“ نام کا معنی    تلاش کے باوجود کسی مستند عربی، اردو یا فارسی لغت میں نہیں ملا۔

بظاہر یہ ایک لفظ نہیں، بلکہ ’’ماہم‘‘ فارسی زبان کے دو لفظوں کا مجموعہ ہے،  ’’ماہ‘‘ بمعنی چاند  اور ’’ہم‘‘  جمع متکلم کا صیغہ ہے ، دونوں کو ملا کرتخفیفاً  ایک ’’ہ‘‘ کو حذف کرلیا گیا ہے، لہٰذا ’’ماہم‘‘ کے معنی ہیں ’’ہمارا چاند‘‘ ۔ 

لہذا ماہم کے بجائے  ”مومنہ“ نام ہی برقرار رہنے دیں  یا  صحابیات  اور نیک مسلمان خواتین کے  ناموں پر نام رکھ دیں۔ فقط واللہ اعلم