سوال

میں اوبر پر گاڑی چلا رہا ہوں مجھے اوبر کمپنی کو فنڈز ٹرانسفر کرنے پڑتےہیں ،کمپنی ایزی پیسہ کے ذریعہ لین دین کرتی ہے ایزی پیسہ شاید ناروے یا کسی ایسے ملک کی کمپنی ہے جنہوں نے حضرت محمد صلی اللہ علیہ وسلم کی شان میں گستاخی کی تھی ،براے مہربانی مجھے بتائیں کہ ایزی پیسہ اکاؤنٹ کھولنے کا گناہ ہے یا نہیں؟ 

جواب

              واضح رہے  کہ  مادّہ پرست دنیا  کے ہاں اپنی ذات  سے زیادہ  اقتصاد ومعاش کو اہمیت دی جاتی ہے، ناروے یا اس قسم کے دیگر ممالک جہاں مادّہ پرستی یا قانونی واخلاقی بے راہ روی کے نتیجے میں بعض افراد اگر اسلامی شعائر یا دینی مقدّسات کے ساتھ توہین آمیزی سے پیش آئے ہیں تو ان کا اقتصادی بائیکاٹ کرنا ان کی اصلاح یا توہین آمیز اقدامات کے انسداد کا مؤثر ذریعہ ثابت ہوا ہے، اور ان ممالک کے بااثر طبقے اور حکومتی حلقے توہین آمیزی کے مجرموں کی قانونی گرفت کے لیے آمادہ ہوتے نظر آئے ہیں۔

                   اس لیے ناروے یا دیگر مغربی ممالک کے آزاد خیال، مذہبی جرائم پیشہ افراد کو ان کے  گستاخانہ جرائم سے روکنے کے لیے ان کے ملک کی مصنوعات کا بائیکاٹ  کیا جائے تو  (گستاخانہ جرائم کے انسداد کا ذریعہ ہونے کی بنا پر  بالکل) کرنا چاہیے، اس نوعیت کا بائیکاٹ ، اسلامی غیرت اور دینی حمیت کا مظہر بھی ہوگا، البتہ لين دين كا دوسرا  کوئی ذریعہ موجود نہ ہو  تو باَمرِ مجبوری  ایزی پیسہ  اکاؤنٹ  استعمال کرنے  كي  شرعًا گنجائش  ہے ۔

فتاوی ہندیہ میں ہے :

"لا بأس بأن يكون بين المسلم والذمي معاملة إذا كان مما لا بد منه كذا في السراجية."

(کتاب الکراهية،الباب الخامس عشر فی اهل الذمة،ج:5،ص:346،دارالفکر)

فقط واللہ اعلم