سوال

کیا جیب میں تصویر ہو پیر ومرشد کی تو گناہ ہے یا نہیں ؟

جواب

 واضح رہے کہ کسی شدید ضرورت کے بغیر جان دار  کی تصویر بنانا یا بنوانا  حرام اور کبیرہ گناہ ہے،خواہ تصویر کسی بھی قسم کی ہو، کپڑے یا کاغذ پر بنائی جائے یا در و دیوار پر، قلم سے بنائی جائے یا کیمرے سے،    دینِ اسلام میں جان دار کی  تصویر سازی، کسی بھی شکل میں ہو (متحرک ہو یا ساکن)کسی بھی طریقے سے بنائی جائے، بناوٹ کے لیے جو بھی آلہ استعمال ہو، کسی بھی غرض و مقصد سے تصویر بنائی جائے، حرام ہے۔ 

لہذا صورت مسئولہ میں پیر ومرشد کی تصویر بنانا اور اس کو پاس رکھنا  شرعاحرام اور کبیرہ گناہ ہے۔

مشکاۃ المصابیح   میں  ہے:

"عن عبد الله بن مسعود قال: سمعت رسول الله صلى الله عليه وسلم يقول: "اشد الناس عذاباً عند الله المصورون."

(باب التصاویر،  ج:2، ص:385، ط: قدیمي)

ترجمہ: "حضرت عبداللہ بن مسعودؓ کہتے ہیں کہ میں نے رسول کریمﷺ  کویہ فرماتے ہوئے سنا کہ :اللہ تعالیٰ کے ہاں سخت ترین عذاب کا مستوجب، مصور (تصویر بنانے والا)ہے۔"

مشکاۃ المصابیح میں ہے:

"عن ابن عباس قال: سمعت رسول الله صلى الله عليه وسلم يقول: "كل مصور  في النار يجعل له بكل صورة صورها نفسا فيعذبه في جهنم."

(باب التصاویر، ج:2، ص:385، ط: قدیمي)

ترجمہ: "حضرت ابن عباسؓ کہتے ہیں کہ  میں نے رسول کریم ﷺ کو یہ فرماتے  ہوئے سنا کہ ہر مصور دوزخ میں ڈالا جائے گا، اور اس کی بنائی  ہوئی ہر تصویر کے بدلے ایک شخص پیدا کیا جائے گا جو تصویر بنانے والے کو دوزخ میں عذاب دیتا رہے گا۔"

مشکاۃ المصابیح   میں ہے:

"وعن عائشة عن النبي صلى الله عليه وسلم قال: "أشد الناس عذاباً يوم القيامة الذين يضاهون بخلق الله."

( باب التصاویر، ج:2، ص:385، ط: قدیمي) 

ترجمہ:" حضرت عائشہ ؓ  ، رسول کریمﷺ سے روایت کرتی ہیں کہ  آپ ﷺ نے فرمایا: "قیامت کے دن سب لوگوں سے زیادہ سخت عذاب  ان لوگوں کو ہوگا جو تخلیق میں اللہ تعالیٰ کی مشابہت اختیار کرتے ہیں۔"

فقط واللہ اعلم