سوال

 سوال یہ ہے کہ ہم کچھ دوست مل کر موبائل خرید کر  اس کی قرعہ اندازی کروانا چاہتے ہیں، قرعہ اندازی کا طریقہ کار یہ ہوگا کہ   موبائل 50ہزار کاہے، اس کی قرعہ اندازی میں پانچ پانچ سو روپے کے ٹوکن وصول کریں گے، اب جس کا نام آئے گا اسی کو موبائل ملے گا ،باقی لوگوں کو کچھ نہیں ملے گا ، یہ صورت شرعاً درست ہے یانہیں؟

جواب

صورتِ مسئولہ میں  قرعہ اندازی میں شریک ہر فرد سے پانچ پانچ سو روپے ٹوکن وصول کرکے قرعہ اندازی  کی بنیاد پر کسی ایک شخص کو وہ موبائل 500 روپے کا بیچ دینا ( چاہے اس سے موبائل کے عوض مزید رقم لی جائے یا نہیں) اور باقی کو محروم رکھنا ، یہ شرعاً جوا ہونے کی وجہ سے حرام اور ناجائز ہے۔

ارشاد بای تعالیٰ ہے:

{یا أیُّهَا الَّذِیْنَ آمنُوا انَّمَا الخمرُ وَالمَیْسِرُ والأنصابُ والأزلامُ رِجْسٌ مِنْ عَمَلِ الشَّیْطانِ فَاجْتَنِبُوْہُ لَعَلَّکُمْ تُفْلِحُوْنَ} [مائدہ:90]

ترجمہ:’’ اے ایمان والو! بات یہی ہے کہ شراب اور جوا اور بت وغیرہ اور قرعہ کے تیر یہ سب گندی باتیں اور شیطانی کام ہیں، سو ان سے بالکل الگ ہوجاؤ، تاکہ تم کو فلاح ہو۔‘‘ (بیان القرآن)

فتاوی شامی میں ہے:

"لأن القمار من القمر الذي یزداد تارةً وینقص أخری وسمي القمار قماراً؛ لأن کلَّ واحد من المقامرین ممن یجوز أن یذهب ماله إلی صاحبه، ویجوز أن یستفید مال صاحبه وهو حرام بالنص."

(کتاب الحظر و الإباحة، فصل في البیع، ج:6،ص: 404، ط : سعید)

فقط واللہ اعلم