سوال

 ایک بندہ جو سید خاندان سے تعلق رکھتاہے، جب کہ اس کی مالی حالت کم زور ہے،  جس کی وجہ سے کئی اوقات دوسروں کے آگے ہاتھ پھیلانے کی نوبت آتی ہے؛ کیوں کہ مذکورہ بندہ جسمانی معذور بھی ہے، اب پوچھنا یہ ہے کہ یہ بندہ زکوۃ لے سکتاہے یا نہیں؟  اور زکوۃ طلب کرسکتاہے یا نہیں؟

جواب

رسول اللہ صلی اللہ علیہ وسلم کا ارشاد مبارک ہے:

"یہ صدقات  (زکات  اور صدقاتِ واجبہ ) لوگوں کے مالوں کا میل کچیل ہیں، ان کے ذریعہ لوگوں کے نفوس اور اموال پاک ہوتے ہیں اور بلاشبہ یہ محمد(صلی اللہ علیہ وسلم) کے لیے اور آلِ محمد(صلی اللہ علیہ وسلم ) کے لیے حلال نہیں ہے۔"

 «إن هذه الصدقات إنما هي أوساخ الناس، وإنها لا تحل لمحمد، ولا لآل محمد»۔ (صحيح مسلم (2/ 754)

لہذا سید کا زکات  لینا اور سید  کو  زکات دینا جائز نہیں ہے، اگر سید غریب اور محتاج ہے تو صاحبِ حیثیت مال داروں پر لازم ہے کہ وہ سادات کی امداد  زکات اور صدقاتِ واجبہ کے علاوہ رقم سے کریں اور ان کو مصیبت اور تکلیف سے نجات دلائیں  اور یہ بڑا اجروثواب کا کام ہے اور رسولِ اکرم ﷺ کے ساتھ محبت کی دلیل ہے۔ اور ان شاء اللہ تعالیٰ آپ ﷺ  کی شفاعت کی قوی امید کی جاسکتی ہے۔

صحیح بخاری میں حضرت ابوبکر صدیق رضی اللہ عنہ کا قول منقول ہے:  "ارقبوا محمداً في أهل بيته".  یعنی رسولِ اقدس ﷺ کے اہلِ بیت کا لحاظ وخیال کرکے نبی کریم ﷺ کے حق کی حفاظت کرو۔

اگر صاحبِ نصاب کی اپنی گنجائش نہ ہو کہ وہ ضرورت مند سید کی زکات کے علاوہ حلال مال سے امداد کرسکے اور اس سے خود کوئی صورت نہ بن سکے تو  دردِ دل رکھنے والے  اصحابِ خیر کو اس نیک کام کی طرف متوجہ کردے کہ وہ سید کی عزتِ نفس کا خیال رکھتے ہوئے اس کی ضرورت پوری کردیں۔

البحر الرائق شرح كنز الدقائق  (2/ 265):

"(قوله: وبني هاشم ومواليهم) أي لايجوز الدفع لهم؛ لحديث البخاري: «نحن - أهل بيت - لاتحلّ لنا الصدقة»، ولحديث أبي داود: «مولى القوم من أنفسهم، وإنا لاتحل لنا الصدقة»."

فقط واللہ اعلم