آج کل زندہ مرغیاں دوکان دار پروں اور پیروں کے ساتھ بیچ کر پھر ذبح کرکے پاؤں اور پر اتار کر دیتے ہیں، صاف ستھری مرغی گاہک کو دیتے ہیں۔ کیا دوکان دار کو ایسا کرنا جائز ہوگا؟ پیر اور پر دوکان دار جمع ہوجانے کے بعد بیچتا ہے، کیا یہ جائز ہے؟
صورتِ مسئولہ میں ایسی مرغی کی تمام اشیاء پر خریدار کی ملکیت ہے، لہذا مرغی کے ذبح کے بعد مرغی فروش پر لازم ہے کہ پروں، پنجوں وغیرہ کے حوالے سے خریدار سے ان اشیاء کے حوالے سے اس کی مرضی معلوم کرلے، پس اگر خریدار پنجے، پر وغیرہ ساتھ لے جانا چاہے تو ساتھ لے جائے، مرغی فروش کو دینا چاہے تو دے دے، تاہم عرفًا چوں کہ خریدار کی جانب سے یہ اشیاء مرغی فروش کے پاس چھوڑ دینے کا رواج ہے، لہذا خریدار کی جانب سے ان اشیاء کا مطالبہ نہ کرنا عرفًا اجازت کے مترادف ہوگا، جس کی بنا پر مرغی فروش ان اشیاء کو آگے فروخت کرسکتا ہے۔ فقط واللہ اعلم
فتوی نمبر : 144204200826
دارالافتاء : جامعہ علوم اسلامیہ علامہ محمد یوسف بنوری ٹاؤن